طريقة وزن الخرازه يدوياً !!!

--------------------------------------------------------------------------------

بسم الله الرحمن الرحيم!!!
اخواني اعضاء وزوار منتدى مكشات!!!
السلام عليكم ورحمة الله!!!
حبيت اعرض لكم افضل طريقه في نظري لوزن دربيل الخرازه!!!
من كثر ماتعبت وتدربت على وزن دربيل الخرازه ومريت كذا محل صار عندي قناعة ان افضل طريقه لوزن الدربيل انك توزنه بنفسك بدون الرجوع للاجهزه او محلات الرحلات لوزنه وبالطريقة التاليه:ـ

(1) اول شي تطلع للبر وماحولك احد و تاخذ معك دسته رصاص ولا حظ ان سعرها من-- الى -- ريال اذا خلصتها بالوزن يعني اقل من قيمة وزن الدربيل عند محلات الرحلات الي توزن البنادق!!!

(2) تاخذ معك كرتون فاضي ويكون كبير اما حق شاشة الكمبيوتر او اي شي ثاني وتاخذ معك قلم رسم عريض لون غامق اسود او احمر او اخضر..... الخ!!!

(3)ترسم على الكرتون عدد من الدوائر الصغيره من 5 الى 10 دوائر بحجم الريال الحديد او بحجم غطاء بيبسي العائله!!!

(4) تحط الكرتون على بعد مناسب من مكانك الي ناوي تجلس فيه وتصوب منه وافضل مسافة في نظري من 40 الى 60 متر كل واحد حسب هواه!!!

(5) تبدى بالتصويب بطلقتين على الدوائر ولاحظ انك لازم تكون راكد بالرمي وافضل شي تراكي البندق على مركي او اثنين وترمي وانت جالس ولا تصوب لين يكون الاكس في نفس الدائره حتى تضمن تصويب ثم وزن ممتاز!!!

(6) (مهم) بعد ماتطلق طالع وين راحت الطلقتين ولو كان فيهن اختلاف بسيط فهذا عادي من الاهتزاز بعد كذا حرك ميزانية الدربيل حسب مكان الطلقه ولاحظ ان الدربيل يوجد فيه ميزانيتين وحده للتحريك اعلى واسفل وهذي تكون فوق الدربيل ووحده للتحريك يمين ويسار وهذي تكون يمين الدربيل (((فاذا كان مكان الطلقه فوق النقطه الي بالكرتون تحرك الميزانيه الي فوق الدربيل عكس دوران عقارب الساعه))) . (((واذا كانت الطلقه تحت النقطه تحركها مع دوران عقارب الساعة))) . ((( واذا كانت الطلقه يسار النقطه تحرك الميزانيه الي يسار الدربيل مع دوران عقارب الساعه))) . ((( واذا كانت الطلقه يمين النقطة تحرك الميزانيه عكس دوران عقارب الساعة))) ويكون تحريك الميزانيه حسب بعد الطلقة من النقطه كل ماكانت الطلقه بعيده حرك الميزانيه اكثر!!!

(7) بعد كذا اطلق طلقه او طلقتين تلاحظ ان الطلقات هالمره كانت اقرب للهدف من الطلقتين الي قبل ويمكن تكون في الجهه الاخرى اذا كنت محرك الميزانيه زياده!!!

(8) استمر على هالطريقه تجد انك وزنت الخرازة تمام التمام الطلقه في وسط النقطه. ويمكن انك ماخسرت الا خمس او عشر طلقات ولو خسرت الدسته كلها ماعليك بعدين تتعلم وتصير توزن بثلاث او اربع طلقات وحاول تطلق على كل الدوائر ولو تغير مكان الطلقه لا تتضايق غالب مايكون من اهتزاز يدك او المكان الي مراكي عليه!!!

ملاحظــــــــــــــــــــــــــــات بعد الوزن؟؟؟؟؟؟؟؟؟
-=اذا رميت على مسافه قريبه 15 او 10متر تلاحظ ان الطلقه تكون تحت الهدف!!!
-=اذا رميت على مسافة بعيده 100 الى 150متر تلاحظ ان الطلقه فوق الهدف !!!
-=وهذا بسبب المسافه الكبيره بين مكان الطلقه ومكان الدربيل بالبندق (الخرازه) علشان كذا لازم تاخذ حساب عند الرمي على هالمسافات ياترفع او تنزل حسب المسافه!!!

نصيحــــــــــــــــــــــته؟؟؟؟؟؟
-=بعض انواع الفشق يزم فحاول توزن الدربيل بنوع واحد هو الي تصيد فيه!!!
-=سبق ان وزنت عند محل رحلات وصار حي الله 30 ريال راحت على الفاضي والله غشاشين!!!
-=على كل حال الدربيل يبي يختلف بعد مده ويبغاله وزن ثاني مره ولاكن هالمره بسيطه تحرك ميزانيه الدربيل حسب جهة اختلافه وتقدر تازنه حتى لوكنت تصيد!!!
-=حسب تجربتي ان الهواء اذا كانت قويه تخطي الهدف مادري وش السبب الاكيد!!!
-=الرمي والسياره طافيه اضمن من الرمي وهي شغاله علشان الاهتزاز!!!

تنبيـــــــــــــــــه؟؟؟؟؟؟
لاترمي الا بعد ماتتاكد ان ماقدامك أي احد من الناس او الحيوانات لان الخرازه (تسوق) يعني تروح بعيد!!!
بخصوص مكان الميزانيه من الدربيل حسب اعتقادي انها ثابته بكل انواع الدرابيل!!!

هذا ماعندي وارجو من اخواني الاعضاء اذا كانت قدمت أي معلومه خاطئه توضيحها مشكورين لان هدفنا واحد!!!

اوجو للجميع مواسم صيد وافره!!!

راعي الهوى مشكوووووور والله يعطيك الف عافيه