شاركنا بأجمل أبيات من الشعر .

ألا يابحر لاتسأل وش أول وآخر أخباري
نسيت الحال من بعده ولا أملكها تدابيرهـ

أجيكـ من العمر ضايق وأرددها لك أشعاري
ولا آبي تسأل شلوني يكفّي الوجه تعبيرهـ

تكسّرني مجاديفه وأجيكـ من الفرح عاري
وأطيح بعزة جروحي على ساحلكـ وآثيرهـ

تعال وضمّني يمّـكـ أبي تغرقكـ أمطاري
وأبي تلفحكـ آهاتي تعيش بجو تسهيرهـ

وأبي تاخذ لي بحقي قهر تطنيشك لـ ثاري
سنين أبكي على موجكـ نغم يخنقك تأثيرهـ

وتخنقني بك الغصه ، يثير الكون إعصاري
لجل أجمعني بموجكـ وأفض الحال والسيرهـ

طيور الشوق تسألني يا وينه صاحبكـ ساري
وترددها لي الكلمات إلا من طال تأخيرهـ

دخيلك ويش أقول إلها وأنا اللي خِلصَت أعذاري
يجي لا ما يجي يمكن لعلّ بغيبته خيرهـ

غريب وغربتي صعبه أحس إبها وسط داري
مشاعر تلتهم صمتي تعيش بداخلي حيرهـ

ألا يابحر وش حاله وهو عن حالتي داري
وأجيه من الوله كني غريب امضيع الديرهـ

على وجهي حزن واضح تعدى سُمك أسواري
فضحني في خطوطٍ تحت رمش العين تكديرهـ

سهر هدْ السهر حيلي وأبعثر ريح تذكاري
وباب مشرّعٍ لجله ، غلاه يحول تسكيرهـ

أمل مامن أمل وأدري تصيح أصفار إنذاري
إلا منّــه تعـــداني وجــــاب الحــزن تصــويرهـ

تحارب عيني الغفوهـ يبات بداخلي شاري
يعيشني تفــاصـيـله دقــايـقـه وحـذافيرهـ

مابين العشق وجنوني وجفاه و رحلة أسفاري
ثواني يأس تسكني وقلبٍ تم تخديرهـ

أحس أنفاسه بصدري ومستوطنته أفكاري
أحسه يابحر فيني وأجي طمعان تسفيرهـ

وتسألني ترى يابحر كل مره وش أخباري
ماكنك عارف الحاله وحافظ مجمل السيرهـ

سؤال يسبق أمواج الغرام بعزف أوتاري
وش أسباب الهجر قلّي أبخلق له معاذيرهـ

تصدق يــــابحر إني أغـيـّر عنْـكـ مشواري
وأشوف الساق تاخذني غصب عني مشاويره

أمانه يابحر قلّه وش اللي موّت أزهاري
وهي كانت بأمر الحب تملى الجو تعطيرهـ

عطيته خافقٍ ينبض سقيته أعذب أنهاري
شعلت أصابعي العشره شموع إلليله تنيرهـ

أحس بنار في صدري ياويل الويل ياناري
أحس بجمرته تشعل رماد الشوق والغيرهـ

لأنه ساكنٍ قلبي وهو بأمر العشق جاري
ياحيف سنين مايسأل ياحق الجار والجيرهـ

عشانه فات من عمري كثير وقلّ مقداري
عشانه قلبي المرهف منعت سنين تأجيرهـ

دخيلك يابحر لامن ذكرني وجاب لك طاري
دخيلك بلّغه إني نسيته مع هوى غيرهـ

للشاعره//// لوعة الشوق